الفيتامينات و المقويات بين الحقيقه و الوهم
#بوست_الجمعه النهارده هيزعل مني ناس كتير .. لأني سأضطر للتخبيط في الحاجه اللي طالما لقوا فيها الأمن و الأمان.. القوة و العنفوان.. عافية العقول و الأبدان .. ألا وهي "الفيتامينات"
يؤمن الناس في مصر و يعتقدون عقيدة لا تتزعزع أن الفيتامينات تقي من الأمراض ( حتي كورورنا و أبو كورونا واللي يتشدد لها) فهي تقوي الجسم و العقل و القلب و العصب و المناعة و القدرة بل هي أحيانا ترد الغائب و تفك السحر و تجلب الحبيب😂
البوست ده لتفنيد الحقائق و الأكاذيب حول الفيتامينات ..
١- أقدر أقول لحضرتك كدكتور مخ و أعصاب .. أن الفيتامينات لا تعالج الرعشة و لا ضعف المشي و لا عدم الاتزان و لا الإرهاق و الإجهاد و لا الألم و ليس لها أي دور علاجي (إلا في أحوال نادرة جدا سأتعرض لها في نقطه ٦).
٢- ما يحتاجه جسمنا من الفيتامينات و المكملات الغذائية يمكن الحصول عليه ببساطه شديدة من غذاءنا اليومي المعتاد .. و مش لازم أكل غالي .. حتي الأكل البسيط ممكن يمدنا بإحتياجتنا اليوميه
مثلا ..فيتامين ج نحتاج منه يوميا إلي حوالي ٦٥ مجم إلي ٩٠ مجم ..ثمره جوافة واحده كافيه للحصول علي احتياجتنا..ربطة بقدونس اللي بجنيه و لا ٢ جنيه كافيه .
٣- مش معني أن الفيتامينات حاجه طبيعيه أن الإكثار منها عادي و البحر يحب الزياده و زيادة الخير خيرين .. لأ حضرتك ..في حاجة اسمها hypervitamniosisيعني زيادة معدلات الفيتامين عن الطبيعي ..لكم أن تتخيلوا أن زيادة فيتامين A عن الطبيعي قد يؤدي إلي زيادة ضغط المخ الحميد .. زيادة فيتامين B6 عن المعدل الطبيعي ممكن يعمل التهاب اعصاب...زيادة فيتامين C بتعمل إسهال.
٤- الفيتامينات و المعادن لا تقوي المناعة .. ربنا خالقنا بمناعة ربانيه و مناعه مكتسبه .. المكتسبة تكتسب من التعرض للميكروبات المختلفة و كذلك تكتسب من التطعيمات.. هناك أدويه تضعف المناعه و تكسر الخلايا المناعية.. لكن لا توجد فيتامينات و معادن لتقويتها.. المناعة عاملة زي العربيه محتاجه صيانه (و صيانتها الأكل الصحي و النوم الصحي و الرياضه و الحفاظ علي الوزن الصحي و منع التدخين و خلافه من العادات الصحيه) .. العربية محتاجة محافظة و صيانة بس مهما حطيت فيها زيوت أصليه غالية مش هتتحول من فيات ل بورش .. كذلك المناعة😒.
٥- بعض الفيتامينات و المعادن تتداخل و تتفاعل دوائيا مع أدويتنا الرئيسية و قد تقلل من فعالية هذه الأدوية (زي الماريفان مثلا) .. بل بعض الفيتامينات و المكملات الغذائية تتفاعل مع بعضها البعض و تعوق بعضها البعض زي مثلا الكالسيوم يعوق إمتصاص الحديد .. و الزنك يعوق إمتصاص النحاس 😏
٦- الفيتامينات لها دور علاجي في أحوال محددة .. مثل المرضي اللي علي نظام غذائي معين calorie restricted deit.. كذلك بعد عمليات السمنة .. حمض الفوليك للراغبات في الحمل ..فيتامين B12 في مرضي أستئصال جزء من الأمعاء .. فيتامين د لمرضي الكساح ..نقص فيتامين ب٦ في الأطفال ممكن يعمل تشنجات .. الحديد لأنيميا نقص الحديد .. نقص الفيتامينات عموما ممكن طبعا يعمل مشاكل و لكن النقص ده نادر جدا جدا و يجب عمل تحليل للتأكد من وجوده و ده يجب أن يكون تحت إشراف طبي.
٧- ايه قصة نقص فيتامين د ..الموضة حاليا .. هو فعلا موضة طلعت فجأة و تم ربطه بالعديد من الأمراض سواء مخ و أعصاب أو غيرها .. و المصدر الرئيسي لفيتامين د هو التعرض للشمس و رغم أن بلادنا مشمسه لكن الغالبية العظمى يعاني من نقص فيتامين د نظرا لأننا لا نتعرض للشمس بالشكل الكافي .. البيوت و المكاتب المغلقه و طبيعة اللبس أحيانا.. التعرض للشمس من ١٠- ٣٠ دقيقة ٤ او ٥ مرات أسبوعيا ممكن يبقي كافي (من ١١ ص إلي ٣ عصرا) و ده الافضل بخلاف المتعارف عليه أن شمس الصبح البدري أفضل .
٨- من أين جاءت المعتقدات الخاطئة عن الفيتامينات .. ؟طبعا ضعف التوعية و غير المتخصصين اللي بيفتوا في أي حاجه.. صالات الجيم ..أعتقد شركات الأدوية لها دور في هذا .. اللي بيكتبوه علي علي الدواء و في نشرات الmultivitamin أنا شايفه جريمه لأنه يحمل الكتير من التضليل و اللعب علي أوتار المعتقدات الخاطئة.
٩-ليه الدكاترة طيب بيكتبوها عمال علي بطال ؟ .. رأيي ٣ أسباب
ا- الرضوخ لضغط المريض و أهل المريض اللي دايما عاوزين فيتامين في الروشته .
ب- ربما القليل من الأطباء ممكن يبقي هو نفسه مؤمن ببعض هذة المعتقدات الخاطئة.
ج- كتير من الأحيان الفيتامينات لهاplacebo effect يعني بتعالج بالإيحاء.. يعني اخد دواء مكتوب عليه مقوي للأعصاب أصحي حاسس نفسي الشحات مبروك😂 🏋️♀️🏋️♀️
١٠- أنا شخصيا بأعاني في محاولة تصحيح المفاهيم المغلوطة دي و ممكن أدخل في جدل عقيم بياخد مني وقت و مجهود .. و ساعات لا يفلح و لا يجدي..اقول لكم حاجه .. ساعات بعد الجدال العقيم و عدم اقتناع المريض مطلقا بعدم جدوي الفيتامينات. .. اقول و الله رحم الله الأنبياء و المرسلين .. تغيير المعتقدات شيء صعب جداا ..ده شويه ده شويه يقول لي " هذا ما وجدنا عليه آباءنا "
في النهايه
اعمل الصح .. ايه هو الصح ؟
خذ الفيتامينات من خلال طبيب و ليس من نفسك و لا من الصيدلية مباشرة .. الفيتامينات و المعادن الناقصة (من خلال تحليل) فقط هي اللي يتم تعويضها
